சப்போட்டாப்பழம்

சப்போட்டாப்பழம், "சிக்கு" என்று பிற மாநிலங்களில் அழைக்கப் படுகிறது. இதில், நார்ச்சத்து, இரும்புச்சத்து, சுண்ணாம்புச்சத்து ஆகியவை நிறைய அடங்கியுள்ளது.

இந்த மரத்தண்டிலிருந்து எடுக்கப்படும் பால் பிசுக்குத்தன்மை மிகுந்தது. அதிலிருந்துதான் "சிக்லெட்" எனப்படும் மிட்டாய் தயாரிக்கப் படுகிறது.

சப்போட்டாப்பழத்தை காய வைத்து, பொடியாக்கி விற்பனை செய்கிறார்கள். இது ஐஸ்கிரீம் தயாரிப்பதற்கு உதவுகிறது.

பழத்தின் தோல், கொட்டை ஆகியவற்றை நீக்கி விட்டு, துண்டங்களாக்கி அப்படியே சாப்பிடலாம்.

சப்போட்டாவை உபயோகித்து, அல்வா, பாயசம் போன்றவற்றையும் செய்யலாம். ஆனால், எல்லோராலும் விரும்பப்படுவது, "மில்க் ஷேக்" தான்.


தேவையானப்பொருட்கள்:

சப்போட்டாப்பழம் - 2 பெரியது
பால் ‍- 1 கப்
சர்க்கரை ‍- 1 டீஸ்பூன் (விருப்பமானால்)

செய்முறை:

பழத்தின் தோல், கொட்டை ஆகியவற்றை நீக்கி விட்டு, துண்டுகளாக வெட்டி, அத்துடன் சிறிது சர்க்கரையைச் சேர்த்து, மிக்ஸியில் போட்டு அரைக்கவும். பின்னர் அதில் பாலை விட்டு மீண்டும் ஒரிரு வினாடிகள் சுற்றவிட்டு எடுத்து, சற்று குளிர வைத்து பரிமாறவும்.

குறிப்பு: ஒரு டேபிள்ஸ்பூன் கிரீம் அல்லது பால் பவுடரை சேர்த்து அரைத்தால், சுவை கூடும்.

நான், MTR பாதாம் பவுடரைச் சேர்த்து செய்தேன். சுவையாக இருந்தது.