அவல் ரோல்ஸ்

தேவையானப்பொருட்கள்:

இன்ஸ்டன்ட் அவல் மிக்ஸ் - 160 கிராம் (2 கப்)
ஜாமூன் மிக்ஸ் - 2 கப் (குவித்து அளக்கவும்)
மிளகாய் தூள்- 1 டீஸ்பூன்
பெருங்காயத்தூள் - 1/4 டீஸ்பூன்
உப்பு - 1/2 டீஸ்பூன்
எண்ணை பொரிப்பதற்கு தேவையான அளவு

செய்முறை:

அவல் மிக்ஸை ஒரு கிண்ணத்தில் போட்டு, அதில் 1 கப் கொதிக்கும் நீரை ஊற்றி கிளறி விடவும்.  மூடி போட்டு  வைத்திருக்கவும்.

ஒரு தட்டில் ஜாமூன் மிக்ஸை போட்டு, அத்துடன் மிளகாய் தூள், பெருங்காயத்தூள், உப்பு சேர்த்து கொஞ்சம் கொஞ்சமாக நீரைத் தெளித்து மிருதுவாக (ஜாமூன் செய்வதற்கு பிசைவது போல்) பிசையவும்.     இதை எலுமிச்சம் பழ அளவிற்கு உருட்டி வைக்கவும்.  இது தான் மேல் மாவு.

மூடி வைத்திருக்கும் அவல் மிக்ஸை திறந்து, நன்றாகப் பிசைந்துக் கொள்ளவும்.  இதை சிறு எலுமிச்சம் பழ அளவிற்கு (ஜாமூன் மிக்ஸ் உருண்டையை விட சற்று சிறியதாக) எடுத்து நீள வடிவில் உருட்டி வைக்கவும். இது தான் உள்ளே வைக்கும் பூரணம்.

கையில் சிறிது எண்ணையைத் தடவிக் கொண்டு ஜாமூன் மிக்ஸ் உருண்டையை எடுத்து, கொழுக்கட்டைக்கு கிண்ணம் செய்வது போல் செய்யவும்.  இதனுள் அவல் உருண்டையை வைத்து எல்லா பக்கத்தையும் நன்றாக மூடி விடவும்.   சப்பாத்தி பலகையில் வைத்து இலேசாக விரல்களால் உருட்டி வைக்கவும்.  எல்லா உருண்டைகளையும் இவ்வாறு செய்து முடிக்கவும்.  சுமார் 15 ரோல்ஸ் கிடைக்கும்.

வாணலியில் எண்ணை விட்டு காய்ந்ததும், 3 அல்லது 4 உருண்டைகளைப் போட்டு, தீயை குறைத்து வைத்து மிதமான சூட்டில், பொன்னிறமாகப் பொரித்தெடுக்கவும்.

தக்காளி கெச்சப் அல்லது புதினா/கொத்துமல்லி சட்னியுடன் பரிமாறவும்.

நான் இதை "கற்பூரவல்லி (ஓமவல்லி)" இலைமேல் வைத்து பரிமாறியுள்ளேன்.  இலையுடன் சேர்த்து சாப்பிட சுவையாகவும் இருந்தது.  சீரணத்திற்கும் சிறந்தது.  இல்லெயென்றால், கேரட், வெள்ளரி போன்ற பச்சை காய்கறிகளை சிறு துண்டுகளாக்கி அதனுடனும் பரிமாறலாம்.
  
கவனிக்க:  இன்ஸ்டன்ட் அவல் மிக்ஸில் தாளிப்பு, உப்பு, காரம் அனைத்தும் இருப்பதால், உடனடியாக உபயோகிக்க முடியும்.  நேரமும் மிச்சமாகும்.  இல்லையென்றால், சாதரண அவலை ஊற வைத்து, தாளித்தும் செய்யலாம்.  ஜாமூன் மிக்ஸ் கை வசம் இருந்ததால் அதை மேல் மாவிற்கு உபயோகித்துக் கொண்டேன்.