• Cooking and Recipes
  • Kolangal / Rangoli
  • அடுப்பங்கரை
மருந்தென வேண்டாவாம் யாக்கைக்கு அருந்தியது அற்றது போற்றி உணின்.
 

தினை தோசை


தேவையானப்பொருட்கள்:

தினை மாவு - 1 கப்
கோதுமை மாவு - 1 கப்
அரிசி மாவு - 1 முதல் 2 டேபிள்ஸ்பூன் வரை
எண்ணை - 4 டீஸ்பூன்
உப்பு - 3/4 டீஸ்பூன் அல்லது தேவைக்கேற்றவாறு

செய்முறை:

தினை மாவு, கோதுமை மாவு, அரிசி மாவு, உப்பு எல்லாவற்றையும் ஒன்றாகக் கலந்து, தேவையான தண்ணீரை விட்டு, தோசை மாவு பதத்திற்கு சற்று நீர்க்க கரைத்துக் கொள்ளவும்.

தோசைக்கல்லை அடுப்பிலேற்றி சூடானதும் எண்ணை தடவி விட்டு, ஒரு கரண்டி மாவை எடுத்து, கல்லின் ஓரத்திலிருந்து வட்டமாக ஊற்றி நடுவில் முடிக்கவும் (ரவா தோசைக்கு ஊற்றுவது போல்).  ஒரு டீஸ்பூன் எண்ணையை தோசையைச் சுற்றி ஊற்றவும். அடுப்பை மிதமான தீயில் வைக்கவும்.  ஒரு பக்கம் சிவக்க வெந்ததும், திருப்பி போட்டு மறு பக்கமும் சிவக்க வெந்தவும் எடுத்து வைக்கவும்.

இதற்கு வெங்காய சட்னி நன்றாக இருக்கும்.

கவனிக்க:  தினை மாவு எல்லா கடைகளிலும் கிடைக்கிறது.  இதில் அரிசி மாவிற்குப் பதில், ஒரு கரண்டி சாதரண தோசை மாவையும் சேர்க்கலாம்.  வெங்காயம், இஞ்சி, பச்சை மிளகாய் சேர்த்தும் செய்யலாம்.

வேர்க்கடலை பொடி


தேவையானப்பொருட்கள்:

வேர்க்கடலை - 1 கப்
வெள்ளை எள் - 1/4 கப்
காய்ந்த மிளகாய் - 6 முதல் 7 வரை
பெருங்காயம் - ஒரு சிறு துண்டு
உப்பு - 3/4 டீஸ்பூன் அல்லது தேவைக்கேற்றவாறு

செய்முறை:

ஒரு வெறும் வாணலியில், வேர்க்கடலையைப் போட்டு, தொட்டால் சுடும் அளவிற்கு வறுத்தெடுக்கவும்.  பின்னர் எள்ளைப் போட்டு பொரியும் வரை வறுத்தெடுக்கவும்.  கடைசியில் பெருங்காயம், மிளகாய் ஆகியவற்றைப் போட்டு ஓரிரு வினாடிகள் வறுத்தெடுத்து ஆற விடவும்.

பின்னர் வறுத்த அனைத்தையும், மிக்ஸியில் போட்டு, உப்பு சேர்த்து கொரகொரப்பாக அரைத்தெடுக்கவும்.


இந்தப் பொடியை, சூடான சாதத்தில் போட்டுக் கலந்து, வேர்க்கடலை சாதமாக சாப்பிடலாம்.  இட்லி/தோசைக்கும் தொட்டுக் கொள்ளலாம்.

உடனடி வெங்காய பக்கோடா

தேவையானப்பொருட்கள்:

இன்ஸ்டன்ட் பஜ்ஜி/போண்டா மிக்ஸ் - 100 கிராம்
வெங்காயம் - 2
இஞ்சி - ஒரு சிறு துண்டு
பூண்டு பற்கள் - 2
சோம்பு - 1/2 டீஸ்பூன்
கறிவேப்பிலை - சிறிது
எண்ணை - பொரிப்பதற்கு தேவையான அளவு

செய்முறை:

வெங்காயத்தை நீளவாக்கில், மெல்லியதாக வெட்டிக் கொள்ளவும்.  இஞ்சி, கறிவேப்பிலையை பொடியாக நறுக்கிக் கொள்ளவும்.  பூண்டை நசுக்கி வைக்கவும்.

ஒரு பாத்திரத்தில், இன்ஸ்டன்ட் பஜ்ஜி/போண்டா மிக்ஸைப் போட்டு, அத்துடன் நறுக்கி வைத்துள்ள வெங்காயம், இஞ்சி, பூண்டு, கறிவேப்பிலை மற்றும் சோம்பு, ஒரு சிட்டிகை உப்பு சேர்த்துக் கலந்துக் கொள்ளவும்.  ஒரு டேபிள்ஸ்பூன் எண்ணையை சூடாக்கி மாவின் மேல் கொட்டிக்  கலக்கவும்.  பின்னர் அதில் சிறிது நீரைத் தெளித்து, கெட்டியாக பிசைந்துக் கொள்ளவும்.

ஒரு வாணலியில் எண்ணை விட்டு சூடானதும், அதில் மாவை கொஞ்சம் கொஞ்சமாக கிள்ளி போட்டு, பொன்னிறமாக பொரித்தெடுக்கவும்.

சாம்பார் சாதம்/புலாவ் போன்றவற்றுடன் தொட்டுக் கொள்ள நன்றாக இருக்கும்.  மாலை நேர சிற்றுண்டியாகவும் டீயுடன் பரிமாறலாம்.

கவனிக்க:  இது  உடனடியாக செய்யக் கூடிய ஒரு "அவசர பக்கோடா".  வழக்கமான வெங்காய பக்கோடா குறிப்பிற்கு  இங்கே சொடுக்கவும்

கற்பூரவல்லி தயிர் பச்சடி

"மெக்ஸிகன் மின்ட்", என்று கூறப்படும் கற்பூரவல்லி இலை (ஒமவல்லி இலை என்றும் சொல்வார்கள்) ஆரோக்கியத்திற்கு மிகவும் நல்லது.  இதை பச்சையாகவும் சாப்பிடலாம். அல்லது கஷாயம்/டீ தயாரித்தும் குடிக்கலாம் சளி, இருமல் தொல்லையிலிருந்து நிவாரணம் கிடைக்கும்.

உணவிலும் சேர்த்து சமைக்கலாம்.  தயிருடன் கலந்து பச்சடியாக செய்தால் சுவையாக இருக்கும்.

தேவையானப்பொருட்கள்:

கற்பூரவல்லி இலை - 5 முதல் 6 வரை (ஒரு கைப்பிடி)
பச்சை மிளகாய் - 1
இஞ்சி - ஒரு சிறு துண்டு
மிளகு - 5 முதல் 6 வரை
சீரகம் - 1/4 டீஸ்பூன்
தேங்காய் துருவல் - 1 டேபிள்ஸ்பூன்
தயிர் - 1 கப்

தாளிக்க:

எண்ணை - 1/2 டீஸ்பூன்
கடுகு - 1/2 டீஸ்பூன்
உளுத்தம் பருப்பு - 1 டீஸ்பூன்
பெருங்காயத்தூள் - இரு சிட்டிகை
உப்பு - 1/2 டீஸ்பூன் அல்லது தேவைக்கேற்றவாறு

செய்முறை:

ஒரு சிறு வாணலியில் 1/2 டீஸ்பூன் எண்ணை விட்டு, அதில் மிளகு, சீரகம், பச்சை மிளகாய், இஞ்சி ஆகியவற்றை ஓரிரு வினாடிகள் வதக்கிக் கொள்ளவும்.  பின்னர் அத்துடன் தேங்காய் துருவலைச் சேர்த்து மீண்டும் ஓரிரு வினாடிகள் வதக்கி விட்டு, அடுப்பை அணைத்து விட்டு, கற்பூரவல்லி இலைகளைச் சேர்த்து வதக்கி ஆற விடவும்.  ஆறியபின், விழுதாக அரைத்தெடுக்கவும்.

தயிரை நன்றாகக் கடைந்து விட்டு, அதில் அரைத்த விழுது மற்றும் உப்பு சேர்த்து கலக்கவும்.  கடுகு, உளுத்தம்பருப்பு, பெருங்காயம்  ஆகியவற்றைத் தாளித்து கொட்டிக் கலந்து பரிமாறவும்.

மிளகு வடை (ஆஞ்சநேயர் வடை)

இந்த மிளகு வடை, ஆஞ்சநேயருக்கு வடைமாலையாக சாற்றுவதற்காக கோவில்களில் செய்யப்படுவது.

தேவையானப்பொருட்கள்:

உளுத்தம் பருப்பு - 1 கப்
மிளகு - 1 டீஸ்பூன்
அரிசி மாவு - 1 டீஸ்பூன்
உப்பு - 1 டீஸ்பூன் அல்லது தேவைக்கேற்றவாறு
எண்ணை - பொரிப்பதற்கு தேவையான அளவு

செய்முறை:

உளுத்தம் பருப்பை 30 நிமிடங்கள் ஊறவைத்து, கழுவி, தண்ணீரை ஒட்ட வடித்து விட்டு, ஒரு வடிகட்டியில் போட்டு வைக்கவும்.

மிளகை கொரகொரப்பாகப் பொடித்துக் கொள்ளவும்.

மிக்ஸியில் உளுத்தம் பருப்பை போட்டு, தண்ணீர் எதுவும் சேர்க்காமல், கொரகொரப்பாக அரைத்துக் கொள்ளவும்.

அரைத்த விழுதை ஒரு பாத்திரத்தில் போட்டு, அத்துடன் அரிசி மாவு, மிளகுத்தூள், உப்பு சேர்த்து நன்றாகப் பிசைந்துக் கொள்ளவும்.

ஒரு வாணலியில் எண்ணை விட்டு சூடாக்கவும்.

ஒரு சுத்தமான ஈரத்துணியில், ஒரு சிறு எலுமிச்சம் பழ அளவிற்கு மாவை எடுத்து வைத்து, மெல்லிய வடையாகத் தட்டவும்.  வடையை துணியிலிருந்து கவனமாக எடுத்து, காய்ந்த எண்ணையில் போட்டு, அரை வேக்காடாகப் பொரித்தெடுக்கவும். எல்லா மாவையும் இப்படியே பொரித்தெடுக்கவும்.  பின்னர், மீண்டும் 4 அல்லது 5 பொரித்த வடைகளை எண்ணையில் போட்டு, நன்றாக சிவக்கும் வரை பொரித்தெடுக்கவும்.

LinkWithin

Related Posts Plugin for WordPress, Blogger...